6-9 mart 2022-ci il
Gənc rejissorların yaradıcılıq laboratoriyasının «BAXIŞ – 2» festivalı
Azərbaycan Teatr Xadimləri İttifaqının təşkilatçılığı ilə İttifaqda fəaliyyət göstərən Gənc rejissorların yaradıcılıq laboratoriyasının «Baxış – 2» festivalı keçirildi.
4 gün davam edən festivalda 8 tamaşa göstərildi.
Açılışda Teatr Xadimləri İttifaqının sədri, Xalq artisti Azər Paşa Nemətov çıxış edərək festival haqqında məlumat verdi və əhəmiyyətini vurğuladı.
Festivalda Gənc rejissorların yaradıcılıq laboratoriyasının beş və İttifaqın digər laboratoriyalarının qonaq qismində üç tamaşası göstərildi. Səhnə əsərləri Azərbaycan Teatr Xadimləri İttifaqının Mustafa Mərdanov adına səhnəsində və İttifaqın böyük zalında oynanıldı. Martın 10-da festival çərçivəsində oynanılan tamaşaların mükafatlandırma mərasimi təşkil olundu. Rejissor laboratoriyasının iştirakçıları sertifikatlarla, qonaq qismində iştirak edənlər isə diplomlarla mükafatlandırıldılar. Gənc rejissorların yaradıcılıq laboratoriyasının bədii rəhbəri Azərbaycan və Kalmıkiya respublikalarının Əməkdar incəsənət xadimi Bəhram Osmanov laboratoriyada iştirak edən gənclərə uğurlar arzuladı.