19 oktyabr 2022-ci il
Gürcüstan Respublikasının Xalq artisti İbrahim İsfahanlının 125 illiyinə həsr olunmuş «Səhnə fədaisi» adlı tədbir
19 oktyabr 2022-ci il tarixdə Azərbaycan Respublikasının Mədəniyyət Nazirliyi və Azərbaycan Teatr Xadimləri İttifaqının təşkilatçılığı ilə görkəmli sənətkar, Gürcüstan Respublikasının Xalq artisti İbrahim İsfahanlının 125 illiyinə həsr olunmuş «Səhnə fədaisi» adlı tədbir keçirildi.
Tədbirdə görkəmli sənət adamları, ziyalılar, teatrsevərlər və media nümayəndələri iştirak etdilər.
Giriş sözü ilə tədbiri Azrbaycan Teatr Xadimləri İttifaqının sədr müavini, Xalq artisti, Dövlət mükafatı laureatı Hacı İsmayılov açdı. O, tədbir iştirakçılarını salamladı, İbrahim İsfahanlının həyatından, onun teatr sənətindəki rolundan danışdı.
Sonra söz aktyorlara verildi. Azərbaycan Dövlət Akademik Milli Dram Teatrının aktyorları Xalq artisti Əli Nur, Əməkdar artistlər Aslan Şirin, Elşən Cəbrayılov və aktyor İlyas Əhmədin ifasında «Səhnə fədaisi» adlı kompozisiya göstərildi. Tədbirdə həmçinin Əməkdar artistlər Qoçaq Əsgərov, Teymur Əmrah və müğənni İlahə Fəda çıxış etdilər. İştirakçılar sənətkarın yaradıcılığını əks etdirən fotosərgiyə və videoçarxa baxdılar.
