TƏDBİR VƏ LAYIHƏLƏR / Müxtəlif tədbirlər

 

 

16 aprel 2020-ci ildə Azərbaycan Teatr Xadimləri İttifaqının sədr müavini, Xalq artisti Rafiq Əliyev vəfat edib. Allah rəhmət eləsin.

Rafiq Hacıbaba oğlu Əliyev

Rafiq Hacıbaba oğlu Əliyev 14 noyabr 1949-cu ildə Füzuli rayonunun Merdinli kəndində anadan olmuşdur.

1957-ci ildə Bakıdakı 58 saylı orta məktəbin birinci sinfinə getmiş, 1968-ci ildə həmin məktəbi bitirdikdən sonra Leninqrad (indiki Sankt-Peterburq) şəhərində Mədəniyyət İnstitutunun Mədəni-Maarif fakültəsinin Rejissorluq bölməsinə daxil olmuşdur. 1971-ci ildə Qırmızı bayraqlı Qara dəniz Donanmasında hərbi qulluğa çağrılmış və 3 il hərbi xidmət etmişdir. 1974-cü ildə Azərbaycan Dövlət İncəsənət İnstitutunun Musiqili Komediya Aktyorluğu fakültəsinə qəbul olunmuş, 1970-ci ildə oranı bitirmişdir.

Sənətkarın Azərbaycan Dövlət Gənc Tamaşaçılar Teatrında, «Azərbaycanfilm» kinostudiyasında, «İbrus» teatrında, «Üns» yaradıcılıq səhnəsində yaratdığı çoxsaylı obrazlar mütəxəssislər və tamaşaçılar tərəfindən müsbət qiymətləndirilmiş, milli teatr və kino sənətimizin inkişafına xidmət etmişdir.

1976-cı ildə Azərbaycan Dövlət Gənc Tamaşaçılar Teatrına dəvət olunmuş Rafiq Əliyev "Bumbaraş"da tamaşasında Bumbaraş, "Üç muşketyor"da Aramis, "Təmas"da Andrey, "Müsyö Jordan və Dərviş Məstəli Şah"da Hatəmxan ağa, "Buratino"da Karabas-Barabas, "Buraxılış gecəsi"ndən Gena, "Müfəttiş"də Dobçinski, "Keçən ilin son gecəsi"ndə Süleyman, "Quyu"da Akif və digər maraqlı rollar ifa etmişdir. Aktyorun yaratdığı Akif obrazı 1966-cı il mövsümünün ən yaxşı kişi rolu elan edilmişdir.

Teatrda işləməklə yanaşı, Rafiq Əliyev "Azərbaycanfilm" kinostudiyasının istehsal etdiyi 20-dən çox bədii filmə çəkilmişdir. Onlardan "Babamızın babasının babası"nda Reportyor, "Ötən ilin son gecəsi"ində Süleyman, "Üzeyir ömrü"ndə Əli Terequlov, "Qəm pəncərəsi"ndə General-qubernator, "Ələqə" filmində astrofizik və psixiator, "Lətifə" filmində Komsomol rəhbəri, "Cansıxıcı əhvalat"da Ortancıl qardaş, "Ailə dairəsi"ndə Qarif, "Nə gözəldir bu dünya"da Ramiz, "Otel otağı" filmində ingilis professoru Luis obrazları xüsusi ilə fərqlənir. Rafiq Əliyev televiziyada da gözəl obrazlar yaratmışdır. M.Ə. Rəsulzadə haqqında filmdə Stalin, "Cəza"da Kərim, "İlğım"da Kişi kimi obrazlar buna parlaq misaldır.

Rafiq Əliyevin həm də rejissor kimi maraqlı quruluşları var. O, 1994-cü ildən Gənc Tamaşaçılar Teatrında quruluşçu rejissor kimi fəaliyyət göstərib. Həmin teatrın səhnəsində "Blez", "Qar qız və yeddi cırtdan", "Bir dəfə Braziliyada", Donaldın qeyri-adi sərgüzəştləri", "Nəsrəddin", Sarıköynək günəşi necə gətirdi", "Hind fantaziyası", "Şəhərli kürəkən", "Krokodil Genanın məzuniyyəti", "Arzuları gerçəkləşdirən", "Sirr", "Çimnaz xanım yuxudadır" əsərlərinə maraqlı quruluşlar vermiş və bu tamaşalar tamaşıçılar tərəfindən rəğbətlə qarşılanmışdır.

"İbrus" teatrında "Şirə bənzər", Akademik Milli Dram Teatrında "Hamlet", İstanbul Bələdiyyə Teatrında "Arslana bənzər", Qazax Dövlət Dram Teatrında "Alov" onun bir rejissor kimi uğurla tamaşaya qoyduğu əsərlərdəndir.

Çoxşaxəli yaradıcılıq fəaliyyəti göstərən Rafiq Əliyev həmçinin bir sıra beynəlxalq kino layihələrində ikinci rejissor, kastinq direktoru kimi də çalışmışdır. Rejissor Ramiz Fətəliyevin çəkdiyi "Həqiqət anı" filmində Əli Ömərov, "Qraf Krestovski" filmində Həbsxana rəisi, "Hökmdarın taleyi"ndə Vanya yüzbaşı, Orxan Fikrətoğlunun çəkdiyi "Papaq" filmində Başçı, Mehriban Ələkbərzadənin "Ölümə məhkum olmuşlar" filmində Müstəniq görkəmli aktyorun son dövrdə yaratdığı gözəl ekran obrazlarındandır.

"İbrus" teatrı və "Üns" Yaradıcılıq səhnəsi kimi mədəniyyyət ocaqlarına öz zəngin təcrübəsi ilə müxtəlif növ yaradıcılıq köməyi göstərən Rafiq Əliyev "İbrus" teatırının səhnəsində "Etimad telefonu" tamşasında Qonaq, "Əlvida, cənub şəhəri"ndə Nazim, "Üns" Yaradıcılıq səhnəsində "Şekspir" tamaşasında Veneralı obrazlarını yaratmışdır.

Rafiq Əliyev Azərbaycanda və xaricdə keçirilən teatr festivallarında da fəal iştirak etmişdir. O, Rusiya Federasiyasının Omsk şəhərində "Rusiyanı gənc teatrları" adlı I və II Beynəlxalq teatr festivallarının, Sankt-Peterburqda keçirilən "Baltika evi" festivalının iştirakçısı, ölkəmizdə keçirilən bir sıra festivallarında Təşkilat Komitəsinin sədri olmuşdur.

Bunlardan əlavə, Rafiq Əliyev bir prodüsser kimi də fəaliyyət göstərmişidir. O, Azərbaycan Teatr Xadimləri İttifaqı Yaradıcı Gənclər Mərkəzi-Laboratoriyasının 2007-ci ildə hazırladığı Qurban Səidin "Əli və Nino" ritual faciəsinin prodüsseri olmuşdur.

Teatr və kino fəaliyyəti ilə yanaşı, Rafiq Əliyev uzun illər Azərbaycan Dövlət Mədəniyyət və İncəsənət Universitetində Musiqili Teatr Aktyoru fakültəsində pedoqoji fəaliyyət göstərmiş, öz sənətinin sirlərini yetişməkdə olan gənc nəslə öyrətmiş, Azərbaycan Teatr Xadimləri İttifaqının Aktyor laboratoriyasında gənclərə ustad dərsləri keçərək, onları sənətin incəlikləri ilə yaxından tanış etmişdir.

2019-cu ildə Azərbaycan Teatr Xadimləri İttifaqının Konfransında İttifaqın yaradıcılıq məsələləri üzrə sədr müavini vəzifəsinə seçilmişdir.

Azərbaycan teatr sənəti qarşısında göstərdiyi xidmətlərə görə 1990-cı ildə Respublikanın Əməkdar artisti, 2007-ci ildə Respublikanın Xalq artisti fəxri adlarına, Azərbaycan Teatr Xadimləri İttifaqının "Qızıl Dərviş" mükafatına layiq görülmüşdür. 2005-ci ildə "Humay" ictimai milli mükafatını almışdır.

31 iyul 2017-ci ildə Rafiq Əliyev Azərbaycan kinematoqrafiyasının inkişafındakı xidmətlərinə görə Azərbaycan Respublikası Prezidentinin fərdi təqaüdünə layiq görülmüşdür.

Rafiq Əliyev 16 aprel 2020-ci ildə Bakıda vəfat etmişdir.