>
previous arrow
next arrow
Slider
 
 
    Əziz dostlar!
 
    Qafqazın ən qocaman yaradıcılıq təşkilatı olan Azərbaycan Teatr Xadimləri İttifaqının teatrittifaqi.az saytında hamınızı xoş gördük.
    2013-cü ildən fəaliyyətə başlayan saytın yaradılmasında məqsəd qurumun keçdiyi inkişaf yolu barədə sizə ətraflı məlumat verməkdən ibarətdir. Azərbaycanın teatr aləmi ilə dünya ölkələrini daha yaxından tanış etmək və İttifaqın beynəlxalq əlaqələrini daha da genişləndirmək məqsədi ilə 2020-ci ildən etibarən saytın yeni variantı yeni dizaynda və 3 dildə təqdim olunur. Azərbaycan, rus və ingilis dillərində tərtib olunmuş sayt İttifaqın tarixinin vacib məqamlarını və bu günki fəaliyyətini özündə əks etdirir.
    1897-ci ildə "Artistlər İttifaqı" adı ilə yaranmış birlik 1917-ci ildən "Müsəlman Artistlər İttifaqı", 1920-ci ildən "Türk Aktyorlar İttifaqı", 1945-ci ildən "Azərbaycan Teatr Cəmiyyəti" kimi fəaliyyətini davam etdirmiş, 1987-ci il 27 fevral tarixli təsis Konfransının qərarı ilə "Azərbaycan Teatr Xadimləri İttifaqı" adlandırılmışdır. Özünün zəngin tarixi boyu müxtəlif adlar altında fəaliyyət göstərsə də, yarandığı vaxtdan bu günə qədər İttifaq bir məqsədə - milli teatr sənətimizin inkişafına və təbliğinə xidmət etmişdir.
    Şərəfli inkişaf yolu keçmiş Teatr  Xadimləri İttifaqına Azərbaycanın müqtədir sənətkarları başçılıq etmiş, onların rəhbərliyi ilə İttifaq zəngin təcrübə əldə edərək, fəaliyyətini dövrün tələblərinə uyğun qurmuşdur. 
    Ötən əsrin 50-ci illərindən etibarən teatr prosesinə və onun inkişafına təkan verən, güclü potensiala malik bir təşkilat kimi formalaşan qurum bu gün beynəlxalq münasibətlər sahəsində də zəngin təcrübəyə malikdir. İttifaq Beynəlxalq Teatr İttifaqları Konfederasiyasının və UNESKO-nun Beynəlxalq Teatr İnstitutunun üzvüdür. Saytın "Beynəlxalq əlaqələr" bölməsində bu barədə ətraflı məlumat verilib.
    Habelə ayrı-ayrı bölmələrdə teatr prosesinin daha da fəallaşmasına yaradıcı təsir göstərən layihələrin həyata keçirilməsi, mədəniyyətlə bağlı dövlət qurumları, yaradıcılıq birlikləri 
 
 

və ittifaqları, elm və təhsil ocaqları ilə mövcud qanunvericilik əsasında əlaqələr, gənclərlə iş, yubileylərin, anma günlərinin keçirilməsi, böyük və kiçik səhnələrdə tamaşalar hazırlanması, nəşriyyat işinin həyata keçirilməsi və s. istiqamətlərdə İttifaqın fəaliyyəti haqqında geniş informasiya təqdim olunub.
    Saytdakı məlumatların teatr sənəti sahəsində çalışan hər kəs üçün olduqca maraqlı və gərəkli olacağına şübhə etmirik. İnanırıq ki, teatrittifaqi.az saytı tərəfinizdən maraqla qarşılanacaq və tezliklə çox sayda izləyici toplayacaq.


 
 
 

 

Xəbərlər

  • 1
  • 2
  • 3
  • 1
  • 2
  • 3
  • Azərbaycan Teatr Xadimləri İttifaqı ölkəmizdə fəaliyyət göstərən ən fəal yaradıcı təşkilatlardan biridir.

  • Milli teatr prosesində fəal iştirak edən İttifaq tarixi ənənəsinə sadiq qalaraq, bu gün də mütəmadi şəkildə yaradıcılıq gecələri, görüşlər, xatirə
  • Özünün əsas vəzifəsini teatr prosesini canlandırmaqda, bütün yeni başlanğıclara təkan verməkdə, milli teatr sənətimizi çağdaş dünya teatr prosesinə qovuşdurmağa çalışmaqda
  • Azərbaycan Teatr Xadimləri İttifaqı dünyanın nüfuzlu teatr qurumlarının: YUNESKO-nun Beynəlxalq Teatr İnstitutunun və Beynəlxalq Teatr Xadimləri İttifaqları Konfederasiyasının həqiqi üzvüdür.
  • 1

İttifaq bu gün

İttifaq bu gün

 

Bu gün Azərbaycan Teatr Xadimləri İttifaqı ölkəmizdə fəlaiyyət göstərən ən fəal yaradıcı təşkilatlardan biridir.

Ətrafında 800-dən artıq üzvü birləşdirən İttifaq tarixi ənənəsinə sadiq qalaraq, bu gün də mütəmadi şəkildə festivallar, müsabiqələr, yaradıcılıq gecələri, görüşlər, xatirə gecələri, konfranslar, seminarlar, ustad dərsləri, brifinqlər, mətbuat konfransları, təqdimat mərasimləri keçirir.

AzTXİ dünyanın nüfuzlu teatr qurumlarının: YUNESKO-nun Beynəlxalq Teatr İnstitutunun və Beynəlxalq Teatr İttifaqları Konfederasiyasının həqiqi üzvüdür. İttifaqda UNESKO-nun Beynəlxalq Teatr İnstitutunun Azərbaycan Milli Mərkəzi yerləşir. 

Beynəlxalq əməkdaşlıq sahəsində uğurlu fəaliyyət göstərən İttifaq 2018-ci ilin noyabrında Gürcüstan Teatr Cəmiyyəti ilə mədəni əlaqələrin inkişaf etdirilməsi haqqında memorandum imzalamışdır. Memorandum çərçivəsində 2018-ci ilin noyabrında Sumqayıt Dövlət Dram Teatrı ilə Kutaisi Dövlət Professional Dram Teatrı, 2019-cu ilin aprel ayında isə Gəncə Dövlət Dram Teatrı ilə Ozurgeti Dövlət Dram Teatrı arasında qarşılıqlı əməkdaşlığa dair memorandumlar imzalanmışdır.

Teatr Xadimləri İttifaqı Azərbaycan Respublikasının Mədəniyyət Nazirliyi, Yeni Azərbaycan Partiyası, Azərbaycan Milli Elmlər Akademiyası, Akademik Milli Dram Teatrı, Dövlət Teatr Muzeyi, Bakı Musiqi Akademiyası, Azərbaycan Dövlət Mədəniyyət və İncəsənət Universiteti ilə birgə teatr sənətinin təbliğində əhəmiyyətli rolu olan bir çox tədbirlər keçirmişdir. 

AzTXİ bütün tarixi dönəmlərdə olduğu kimi, bu gün də nəşriyyat işinə xüsusi önəm verir. İttifaqda hər il Azərbaycanın görkəmli sənətkarlarına həsr olunmuş kitab çap olunur və beynəlxalq təşkilatlara, ölkə kitabxanalarına təqdim edilir.

İttifaqın tamaşa salonunda və Xalq artisti Mustafa Mərdanovun adını daşıyan kiçik səhnəsində anım günləri, yubileylər, görüşlər keçirilir,  «Zəfər» teatr studiyasında hazırlanmış tamaşalar oynanılır, gənclərin yaradıcılıq potensialının üzə çıxması üçün onlara geniş imkanlar yaradılır və müxtəlif formalı digər tədbirlər  keçirilir.

AzTXİ yaradıcı gəncliyin inkişafını daim nəzər-diqqətində saxlayır və onlara beynəlxalq layihələrə qatılmaq üçün şərait yaradır.

İttifaq döyüş bölgələrində fəaliyyət göstərən teatrların yaradıcılıq şəraitini daim diqqət mərkəzində saxlamış, onlarla vaxtaşırı görüşlər keçirmiş, teatrların problemləri ilə maraqlanmış və həllinə çalışmışdır.

Yeni başlanğıclara dəstək verən İttifaq gənc dramaturq, aktyor, rejissor və teatrşünaslarının laboratoriyasını açmışdır. Burada müntəzəm olaraq tanınmış sənətkarlar ustad dərsləri keçirirlər. Laboratoriya iştirakçıları İttifaqın təqdimatı ilə müxtəlif illərdə MDB, Baltikyanı ölkələr və Gürcüstan gənclərinin Teatr forumunda iştirak etmişlər. Dramaturq, teatrşünas, rejissor və rəssamların yaradıcılıq nümunələri Moskvada Beynəlxalq Teatr İttifaqları Konfederasiyasının nəşr etdirdiyi topluda çap olunmuşdur.

Özünün əsas vəzifəsini teatr prosesini canlandırmaqda, bütün yeni başlanğıclara təkan verməkdə, milli teatr sənətimizi çağdaş dünya teatr prosesinə qovuşdurmağa çalışmaqda və bunun üçün bütün imkanlardan istifadə etməkdə görən Azərbaycan Teatr Xadimləri İttifaqı bu məqsədlə gələcəkdə də özünün proqram xarakterli layihələrini həyata keçirmək niyyətindədir.

© Copyright 2019, Azərbaycan Teatr Xadimləri İttifaqı